ჩემპიონთა ლიგის პლეი-ოფის შეხვედრა მადრიდის „რეალსა“ და ლისაბონის „ბენფიკას“ შორის გარკვეული დროით შეწყდა, მას შემდეგ რაც „რეალის“ ბრაზილიელმა ვარსკვლავმა, ვინისიუს ჯუნიორმა, მსაჯს მეტოქე გუნდის ფეხბურთელის მხრიდან შესაძლო რასისტული შეურაცხყოფის შესახებ აცნობა.
ინციდენტი მეორე ტაიმის დასაწყისში მოხდა. მანამდე ვინისიუსმა მატჩის ერთადერთი გოლი გაიტანა. შეხვედრა „ბენფიკას“ სტადიონზე მიმდინარეობდა. გოლის შემდეგ ბრაზილიელი ფეხბურთელი მოედნის კუთხისკენ გაიქცა, ტრიბუნებისკენ შებრუნდა და გოლი ემოციურად აღნიშნა, რის შემდეგაც თანაგუნდელებთან ერთად მოედნის საკუთარ ნახევარზე დაბრუნდა.
რამდენიმე წუთში ვინისიუსი არბიტრთან მივიდა და განაცხადა, რომ „ბენფიკას“ 20 წლის არგენტინელმა ფეხბურთელმა ჯანლუკა პრესტიანიმ მას შეურაცხმყოფელი სიტყვები უთხრა. FIFA-ს პროტოკოლის შესაბამისად, მსაჯმა თამაში დროებით შეაჩერა. გუნდებსა და ოფიციალურ პირებს შორის კონსულტაციის შემდეგ მატჩი დაახლოებით 10 წუთში განახლდა.
გავრცელებულ ვიდეოჩანაწერში ჩანს, როგორ იფარავს პრესტიანი მაისურს პირზე, უყურებს ვინისიუსს და რაღაცას ეუბნება.
მატჩის შემდეგ მადრიდული კლუბის თავდამსხმელმა კილიან მბაპემ განაცხადა, რომ მისი თანაგუნდელი მართლაც შეურაცხყოფის მსხვერპლი გახდა. მბაპეს თქმით, პრესტიანიმ შეურაცხმყოფელი სიტყვები რამდენჯერმე გაიმეორა და ეს სხვა ფეხბურთელებმაც გაიგონეს.
მბაპემ ასევე აღნიშნა, რომ ჩემპიონთა ლიგის დონეზე მოთამაშე ფეხბურთელისთვის მსგავსი ქცევა მიუღებელია, თუმცა ამავე დროს პატივს სცემს „ბენფიკას“ კლუბს და მის მთავარ მწვრთნელს, ჟოზე მოურინიოს.
თავად პრესტიანის მომხდართან დაკავშირებით ოფიციალური კომენტარი ჯერჯერობით არ გაუკეთებია.
„ბენფიკას“ მთავარმა მწვრთნელმა ჟოზე მოურინიომ განაცხადა, რომ ინციდენტის შესახებ მონაწილე მხარეებისგან განსხვავებული ვერსიები მოისმინა. მისი თქმით, ვინისიუსმა გოლი ზედმეტად პროვოკაციულად აღნიშნა.
აღსანიშნავია, რომ მატჩის მიწურულს მოურინიო მოედნიდან გააძევეს, რადგან მსაჯის გადაწყვეტილებას — ვინისიუსისთვის მეორე ყვითელი ბარათის არჩვენას — ემოციურად აპროტესტებდა.
მატჩის შემდეგ მოურინიომ ჟურნალისტებთან საუბარში აღნიშნა, რომ ვინისიუსმა ძალიან კარგი გოლი გაიტანა, თუმცა მსგავსი მომენტები პატივისცემით უნდა აღინიშნოს. მან ასევე ხაზი გაუსვა, რომ „ბენფიკას“ ისტორიაში ერთ-ერთი უდიდესი ფეხბურთელი ეუსებიო იყო და კლუბს რასიზმთან დაკავშირება უსამართლოა.
